沪语的写法

文/陈金生

我搭几个朋友侪对沪语感兴趣，有一趟通过微信聊起哪能写沪语，因为眼门前沪语使用范围越来越广，沪语文章也越来越多，但是勿少文章里个沪语写得有点自说自话。比方，“事体”写成“事替”、“吃物事”写成“砌墨池”……像辣辣做“音译”题。

我先发了一个“我”字，让几个朋友改成沪语。一歇歇，大家侪用手机发来答案，有人写“额”，有人写“饿”，还有写“鹅”。我一看，笑得肚皮痛，勿管是勿是上海闲话，“我”就是“我”，勿好乱七八糟瞎写个，否则要闹笑话个。

我再出一道题目：“上海人”。答案来了：“上海宁”“桑海宁”“伤害人”。我回答伊拉：全部侪是错个。“上海人”沪语写法就是“上海人”。伊拉勿服帖，讲勿少公开场合有搿种写法。有人拍仔一张照片发到群里，是某家食品厂生产个饼干包装，上面有交关上海闲话个词组，像“切清桑”“伐要浪费”“米道嗲”“切到饱”“噶地将”。搿家食品厂辣包装让用仔交关沪语词组，肯定是想凸显伊拉是上海个企业，增加产地特色。勿过么，搿能“音译”沪语，难免让人看得莫名其妙。其实，应该分别写成“吃清爽”“覅浪费”“味道嗲”“吃到饱”“价钿口强”。

上海话是上海最显著个文化标志，是上海名片，承载了上海搿座城市个文化血脉和历史记忆。上海要在文化上有其鲜明特色，上海话应该得到更好个传承。假使上海话个读音勿规范，汉字写法各行其是，推广沪语就会走样。

其实，要想拿上海话写得规范一点勿难，因为已经有研究方言个专家出版了好几本字典，比如《上海方言词典》《上海话大词典》《简明吴方言词典》，一般沪语侪能寻着规范个写法。

呒没规矩勿能成方圆，随心所欲乱拼乱写总归勿是生意经。